共台語抾轉來

足久以前我有一支倒爿下跤的後齻因為蛀齒挽掉了，有裝一支假--的。最近彼支邊仔的齒岸逐不時就咧發炎，照電光了後齒科醫生講彼支喙齒下跤已經必--去矣，既然已經抽過神經，嘛無法度閣補強，建議共伊挽掉、重種一支較規氣。

約好時間，今仔日下晡我調課、請假，來揣醫生處理。

醫生先注麻射，共彼支無愛挃的挽掉。挽的時陣閣會痛，伊小停一下，閣補寡麻射。尾仔喙䫌就無感覺矣。整理空喙了，愛閣補骨粉落去，予齒岸袂崩--落，另日欲種一支喙齒較會在。

咧補骨粉進前，閣有先共我的面消毒過、鋪無菌的布佇我的面頂懸，醫生拄仔會當對挖的彼空看著我的喙爾爾。我愛做的代誌就是躺予好勢、喙開甲上開、莫烏白振動。因為目睭開開嘛看無啥，我就目睭瞌瞌，瞌久煞險仔睏去。彼種感覺足奇怪，我知影我袂當睏(嘛無可能睏)、醫生當咧共我處理喙齒，我的喙嘛愛褫甲上開予醫生好操作，毋閣我啥物代誌攏免做，嘛袂當做，躺的隨在醫生看伊欲變啥魍。腦筋開始想東想西，想一寡足成咧眠夢的代誌。醫生可能驚我傷無聊(？)一陣仔就會開喙問我：「猶閣會使無？」意思是若有無爽快愛共講。我攏嚨喉出聲「嗯嗯」表示我閣清醒、無問題。毌過實際上是真正差一點仔就睏去矣。

差不多舞一點外鐘，變好勢矣，醫生交代一寡愛注意的代誌，約好回診的時間，我就轉來矣。麻射猶未退，我的倒爿喙脣佮喙䫌無法度自由振動，和啉水嘛怪怪，閣會流出來。一直到5點鐘了後才差不多完全退去。賰的就是愛好好仔照顧空喙，莫予細菌感染著。(昨昏我閣聽一个年歲佮我差不多的同事咧講，伊最近拄仔去共大學同學拈香，是因為挽喙齒曲去--eh！講喙齒免了、過幾工發燒，佇厝裡昏倒，送病院無幾工就無--去矣。可能是細菌感染、落尾心臟無力按呢。聽了感覺真恐怖！我上網去查，有幾个例攏是因為挽喙齒結果曲去，這毋是小手術呢！)