記錄一下今仔日我感覺真特別的代誌。
下晡社團課，輪到我進前寫課程計畫時寫的「羽毛球課」。昨昏我特別共囡仔交代，今仔日愛紮拍羽毛球的用品來。宣布了後就開始聽著一寡聲音：阮兜無羽毛球球桮啦、是按怎欲拍羽毛球啦、我敢會當拍籃球就好……
我聽著掣一下，想講羽毛球球桮毋是厝內底就四常應該就有的物件？哪會有人in兜無？現場小調查一下，問看厝內底有球桮的人攑手，結果閣真正無全班攏有。今害矣，我無想著這點。只好共囡仔講，有的人加紮一支，無的人會使佮有的人輪流拍球。我閣建議講，若無，看欲考慮去買一支無？這馬一支球桮其實嘛袂蓋貴，俗的兩三百箍就買有矣。
今仔日中晝我閣共阮同事講，阮學生講欲去拍籃球，我毋知欲予去無？想講予囡仔加寡運動機會，若無紮球桮的人佇邊仔看無運動就足無彩，毌過予in去拍籃球閣變做另工in規氣攏莫紮球桮，直接就去拍籃球就好矣，按呢毋是我的本意……小可苦惱。
下晡上課進前，我閣換短褲、穿球鞋仔，共我紮的球桮提落去一樓。阮班的囡仔已經攏佇遐矣，嘛已經開始拍球矣。算算咧，差不多有咧欲20支球桮，賰無幾个真正無法度借著的佇邊仔看。我家己借一支予學生，我提一支佮一个查某學生拍。拍一下仔我就借予學生去拍，我巡巡咧，看逐家攏拍甲真歡喜，嘛無人共我走去運動埕抑是籃球場遐，攏足乖的佇我規定的所在拍球。其實阮學校嘛無啥物場所通拍羽毛球，就是佇兩棟大樓中彼空，拄仔好風會當予閘著的所在，較袂影響著拍羽毛球。學生嘛是輪流拍球，袂講一直歇睏，嘛袂無想欲換人，看起來拍甲真爽。我愛注意的就是莫予in走傷過倚三年仔的教室遐，驚吵著in讀冊，學校會有意見。
一節課過去，我嘛加減仔有運動著，時間到叫in收煞準備轉去教室，閣有進前共我講敢會當去拍籃球的學生講，原來拍羽毛球這爾仔好耍，會使閣拍一節課無？(後一節嘛是我的課)轉來教室了，in閣看別班的人佇阮本底咧拍的所在準備欲拍，足欣羨的表情。一直問講是按怎袂當閣繼續拍落去……我聽著足安慰，嘛真意外in的表現共我本底想的無仝，真好！
結果紲落來阮咧分後禮拜欲煮火鍋的組別，in分甲淡薄仔無爽快，因為足濟組攏無愛佮一个查埔學生仝一組。這件代誌予我想無，平常時仔有兩三个攏足好、嘛足愛做伙耍，哪會雄雄分組的時陣彼个查埔學生無人愛做伙仝一組？我搝一寡學生來邊仔問，結果毋知是in有運動著、拍了爽、心情好，攏足好禮開始佮我講一堆想法，我真正毋捌聽in講過嘛無知影原來彼个學生有這款的症頭！有當時仔閣會對我大細聲應喙應舌的一个查埔學生，嘛是沓沓仔佮我講伊對彼个學生的感覺(好禮甲我顛倒掣一趒)。
感覺運動了，囡仔的情緒較穩定，心情嘛加足好！我早時仔煩惱的代誌攏無發生，囡仔運動了變較乖巧，真正足意外的！看後回第二改拍羽毛球了會使有仝款效果無？
留言列表
